"नको ते"

लाख वाटले व्हावे हवे ते
पण होत नको तेच आहे

त्यांनी गिळून पचवला म्हणे अपमान
मी मनस्ताप व्यर्थ ओकतेच आहे

तोलला गेला तराजूत माझा खरेपणासुद्धा
खोटेपणाला त्यांच्या मात्र माप झुकतेच आहे

केला विपर्यास मी हातमिळवणीचा एकदा
टाळी एका हाताची अजून मी ऐकतेच आहे

हो, भरला असेल माझा त्यांच्यामताचा घडा
तरी काठाशी हे चार उसासे मी टाकतेच आहे

नका मांडू माझ्यापुढे लांबलचक पदावल्यांना
बेरीज साधी दोन आकडी अजून मी चुकतेच आहे ...