"हितगुज"

आज जरा भटकू म्हटलं                                  
व्यापाला या झटकू म्हटलं
शोधुया एक हाक जवळली 
शंका जिथे स्वतः निवळली 
आडोशाला गाठू म्हटलं                              
दुःख मनाचं वाटू म्हटलं 
गर्दीतला सपाट चेहरा 
गर्दीतच राहू देत 
बाहेर येऊन माझ्यातून 
मला जरा पाहू देत 
वाहु देत जाणिवांना
भार अवघा लोटू म्हटलं 
बस ,माझी मला असावी साथ 
अन जगण्याला यावी बात 
मग हसतच मी एकांताला 
ये असाच, भेटू म्हटलं 
भिजता भिजता मी आटुन जावं 
तरी मनाने नटून जावं 
माझ्यात मला मीच नव्याने 
पुन्हा एकदा ओतु म्हटलं 
आज जरा भटकू म्हटलं                                  
व्यापाला या झटकू म्हटलं....