"आतुरता"

टिपूर चांदणे आकाशात बहरता
कळी खुले मनाची उगा आठवण होता

तो असेल याच आकाशाच्या खाली
निवांत त्या ताऱ्याला जरी हा पाही
तारयात तयाला दिसेन मी का आता
कळी खुले मनाची उगा आठवण होता

माझ्यासंगे ही रात्र तशी ती एकटी
तो नाही तरी भास असती सोबती
तो हसतो खळीतून भावनांचा कसा गुंता
कळी खुले मनाची उगा आठवण होता

वारा मजला थांबला बरा वाटे
अन डोळ्यांमध्ये हलके उदासी दाटे
येईल कधी तो गाणे माझे गाता
कळी खुले मनाची उगा आठवण होता

मन माझे अर्धे अन पुरते सुकलेले
तो अर्धा तिकडे पण अंतर हे चिमुकले
मिटता मी डोळे तोच आणि आतुरता
कळी खुले मनाची उगा आठवण होता